Wikileaks El Asli -- ونامت الحلوة ع كتف نجمة

    ونامت الحلوة ع كتف نجمة

غمزت الهوا عالسما ودّاني
وشوشت القمر في بنت نعسانة
ركض يلملم من العطر ضحكات
يرشن عليكي تا عالوردة تنامي

نجوم السما تحكيلك حكايات
حكاية حلا وعشق وغناني
وتنزل غيمة ع غفلة النجمات
تسرق بوسة من خدود دبلانة

ويصير الندي يودع الحبقات
ويحط خدو ع كتف دفيانة
وشعرك ال طاير بس هبت النسمات
خصل عم ترقص وخصل زهقانة

إن حلمتي فيي بالحلم همسات
خلي هالزمن يوقف ثواني
تقولي عجل بدنا نمشي الزمن
وخربط العقارب وشقلب المعاني

مرق العمر ولمحك غفيانة
صفن بخدودك وبهالجملة وصّاني
إن كنتي فايقة من الحلا آيات
وإن كنتي نايمة نحت ربّاني



كتابة: شادي ذبيان