Wikileaks El Asli -- شو كان في بحقيبة طلال؟

    شو كان في بحقيبة طلال؟














قعد طلال يبكي عالأطلال، والشعب محروق دينو مش مصدق إنو صار عندو حكومة. ومن وقت ما كنا زغار، اتضحكوا علينا بكتاب التاريخ إنو سنة 1943 اخدنا الاستقلال. يومها تألفت حكومة بشامون من شخصين: مجيد ارسلان وحبيب أبو شهلا. يعني بيّو لطلال كان آخد نص أعضاء الحكومة، وهلق طلال أخد عضو واحد من نجيب. طبعاً ما عجبو لطلال، للي بعدو عم يبكي عالأطلال، وقعد يسب نجيب بس ما في مين يستجيب.

قام طلال سكّر راسو وسكّر هالحقيبة واستقال. وضل هالشعب المعتر سهران عم بفكّر شو فيها هالحقيبة. وليه ما عجبتو لطلال للي بعدو عم يبكي عالأطلال؟ معقول كان بدو ياها جلد وعطوه وحدة بلاستيك؟

العالم مش عم بتلاقي شغل، والشباب عم بسافروا عالخليج، والبطالة رح تاكل الناس، ومع هيدا وكلو طلال ما بدو يكون وزير. شو فيها شغلة وزير يعني يا طلال؟ الشغل مش عيب.

المهم، ضليت كل النهار عم فتش عالدولة تا اعرف ليه حقيبة وزير دولة مش قد المقام. لفيت كل الشوارع أنا وفتش عالدولة، ضليت فتش وفتش...بالأخير لقيتها. كانت الدولة مرمية بكيس معفن عالرصيف. فتحت الكيس ولقيت شنطة سمسونايت سودا مكتوب عليها "حقيبة وزير دولة".
فتحت الحقيبة وقعدت اتضحك...
...
...
...
لقيت ورقة تواليت مكتوب عليها:
طز بهيك دولة وبهيك حكومات



كتابة: شادي ذبيان
حزيران 2011