Wikileaks El Asli -- الله لا يقيمك يا استاذي

    الله لا يقيمك يا استاذي



من أول ما وعيت عالدني وأنا بكره شهر آذار. شهر أنتج أوسخ الطبقات السياسية بالتاريخ، وشهر بيحمل أكبر خيبة أمل بالعالم: عيد المعلم (بغض النظر عن مطالبهم المعيشية المحقة).‏

أول شي بحب اتذكر كل للي علموني بالمدرسة مع إنو نصن صار تحت التراب، وبحب عبرلهم عن حقدي وكرهي من أساليبهم المبتذلة.‏

  • علمونا نخاف من كل شي
  • علمونا نضل ساكتين بس الاستاذ يحكي
  • بهدلوا سما ربنا كل ما غلطنا بدل ما يعلمونا شو الصح وشو الغلط
  • علمونا إنو الناظر بالمدرسة لازم يضل عابس ورافع حاجبو، بدل ما يبتسم ويكون حدك بمثابة صديق
  • علمونا نقرا كلمات وأسطر، بس ما علمونا نقرا لنجيب محفوظ أو محمود درويش
  • علمونا نسمع الكلمة والبهدلة، بس ما علمونا نسمع للست فيروز أو موسيقى كلاسيكية
  • علمونا نكتب ١٠٠٠ سطر كل كلمة بلون، بس ما علمونا نكتب رأينا فيهن
  • علمونا دين، بس ما علمونا الأخلاق
  • علمونا ١٢ سنة لغة عربية، وبعدنا لهلق ما منعرف الفرق بين قعود وجلوس


أكتر ورقة كان يلعبها هيدا النظام التعليمي هي تهديدنا إنو إذا منعمل شي غلط بقولوا لأهلنا، وكبرنا ع فكرة إنو الأهل مش لازم يعرفوا بس نعمل شي غلط، بدل ما يكونوا أول أشخاص نحكيلن. لما يكون عندك هيك نظام تعليمي فاشل، ما تسأل ليه عندك هيك شعب فاشل.‏

بهالنهار السيء الذكر، بقول لكل للي علموني عربي وإنجليزي ورياضيات وتاريخ وجغرافيا وغيرهم: أنا نسيت كل شي علمتوني ياه، بس بعدني مذكر القيم والمبادئ للي أنا علمتها لحالي بلا جميلتكم...‏

من علمني حرفاً صرت له عبداً، لذلك بقيت جاهلاً حراً

كتابة: شادي ذبيان
آذار 2012